| 1. Alleluia perenne Alleluia piis edite laudibus, cives aetherei psallite naviter Alleluia perenne. Hoc fessis requies, potus hoc et cibus, oblectans reduces haustibus affluis. Alleluia perenne. Nos te suavisonis, conditor affatim rerum, carminibus laudeque pangimus. Alleluia perenne. |
|
| 2. Iesu corona virginum (Ambrosius) Iesu corona virginum, quem mater illa concipit quae sola virgo parturit haec vota clemens accipe. Qui pergis inter lilia saeptus choreis virginum sponsus decorus gloria sponsisque reddens praemia. Quocumque tendis virgines sequuntur atque laudibus post te canentes cursitant hymnosque dulces personant. Te deprecamur supplices nostris ut addas sensibus nescire prorsus omnia corruptionis vulnera. |
|
| 3. Vt queant laxis (Paulus Diaconus) Vt queant laxis resonare fibris mira gestorum famuli tuorum, solve polluti labii reatum, Sancte Ioannes. Nuntius celso veniens Olympo te patri magnum fore nasciturum, nomen et vitae seriem gerendae ordine promit. Ille promissi dubius superni perdidit promptae modulos loquelae, sed reformasti genitus peremptae organa vocis. Ventris obstruso recubans cubili senseras regem thalamo manentem: hinc parens nati meritis uterque abdita pandit. |
|
| 4. Stabat mater (Iacobus Tudertinus [?]) Stabat Mater dolorosa iuxta crucem lacrimosa, dum pendebat filius; cuius animam gementem contristatam et dolentem pertransivit gladius. o quam tristis et afflicta fuit illa benedicta mater unigeniti! quam maerebat et dolebat, pia mater, dum videbat nati poenas inclyti. quis est homo, qui non fleret, matrem Christi si videret in tanto supplicio? quis non posset contristari, Christi matrem contemplari dolentem cum filio? Pro peccatis suae gentis vidit Iesum in tormentis et flagellis subditum. Vidit suum dulcem natum moriendo desolatum dum emisit spiritum. eia, mater, fons amoris, me sentire vim doloris fac, ut tecum lugeam. fac, ut ardeat cor meum in amando Christum Deum, ut sibi complaceam. |
Zurück zum
Verzeichnis der Vertonungen antiker Texte
Zurück zum
Verzeichnis der Vertonungen neu- und mittellateinischer Texte